அரியலூர் மாவட்டம், கீழப்பழூர் அருகே பொய்யூர் கிராமத்தைச் சேர்ந்தவர் புஜஹேந்தி. இவரது மகன் விக்னேஷ் (25). வேலைக்காக வெளியூர் செல்ல முயன்றார். இந்நிலையில் கடந்த செவ்வாய்க்கிழமை இரவு வீட்டில் இருந்த விக்னேஷை, அவரது நண்பர்கள் மது அருந்த அழைத்துள்ளனர்.
இதையடுத்து, வீட்டை விட்டு வெளியேறிய விக்னேஷ் நீண்ட நேரமாகியும் வீடு திரும்பவில்லை எனக் கூறப்படுகிறது. சந்தேகமடைந்த உறவினர்கள் அவரை பல்வேறு இடங்களில் தேடினர். இந்நிலையில், மல்லூர் அருகே வனப்பகுதியில் தலையில் பலத்த காயங்களுடன் விக்னேஷ் சடலமாக மீட்கப்பட்டார்.
இதுகுறித்து தகவல் அறிந்த கீழ்ப்பாக்கம் போலீசார் சம்பவ இடத்துக்கு விரைந்து வந்து அவரது உடலை கைப்பற்றி பிரேத பரிசோதனைக்காக அரியலூர் அரசு மருத்துவமனைக்கு அனுப்பி வைத்தனர்.
மேலும் இச்சம்பவம் குறித்து வழக்குப்பதிவு செய்து அதே பகுதியை சேர்ந்த விக்னேஷின் நண்பர் தர்மராஜ் என்பவரை கைது செய்து விசாரணை நடத்தினர். அப்போது விக்னேஷ், ஒல்லியான உருவமும், தடித்த உடலும் கொண்ட தர்மராஜை அடிக்கடி கேலி, கிண்டல் செய்து வந்தார்.
மேலும், விராட் கோலியின் தீவிர ரசிகரான விக்னேஷ், மது அருந்திய போது, தர்மராஜுக்கு பிடித்த ரோகித் சர்மாவை தவறாக பேசியதாக கூறப்படுகிறது.
இதனால் ஆத்திரமடைந்த தர்மராஜ், தான் வைத்திருந்த மட்டையால் விக்னேஷ் தலையில் அடித்தார். இதில் பலத்த காயமடைந்த விக்னேஷ் சம்பவ இடத்திலேயே உயிரிழந்தது தெரியவந்தது. இதையடுத்து தர்மராஜை போலீசார் கைது செய்து விசாரணை நடத்தி வருகின்றனர்.
